कोरियामा नेपाली विद्यार्थी : कन्सल्टेन्सीको ललिपप, डिप्रेसनमा विद्यार्थी

- नेपाली सन्देश

नेपालीहरूका लागि रोजगारीको आकर्षक गन्तव्य हो दक्षिण कोरिया । कोरियन भाषा पढेर ईपीएस परीक्षा उत्तीर्ण गरेपछि कोरियामा रोजगारीमा जान पाइन्छ । कोरिया पुगेकाहरूले मासिक करिब २ लाखको हाराहारीमा बचत गरेको धेरै नेपालीले देखेका छन् । आकर्षक कमाइ हुने सपना देखेका नेपालीहरू इपीएस परीक्षामा उत्तीर्ण हुन नसके विद्यार्थी भिसामै भए पनि कोरिया जान थालेका छन् ।

७, ८ वर्षअघिसम्म कोरियामा उच्च शिक्षाका बारेमा कुनै जानकारीसम्म नभएको नेपालमा पछिल्लो ५ वर्षमा भने यसले छलाङ नै मारेको छ । पछिल्लो ५ वर्षमा करिब ३ हजार ५ सय नेपाली विद्यार्थीहरू उच्च शिक्षा अध्ययनका लागि भन्दै दक्षिण कोरिया पुगेका छन् ।

गत आर्थिक वर्ष अर्थात् आर्थिक वर्ष २०७४/७५ मा मात्रै नेपालबाट नो अब्जेक्सन लेटर (एनओसी) लिएर दक्षिण कोरियामा उच्च शिक्षाका लागि पुग्ने विद्यार्थीको सङ्ख्या १ हजार २९ जना पुगेको छ । दक्षिण कोरिया जाने विद्यार्थीको चाप दैनिक रूपमा बढ्न थालेको छ । तर के दक्षिण कोरिया अध्ययनसँगै रोजगारीका लागि आकर्षक मुलुक हो त ?

केही समयअघि दक्षिण कोरियास्थित नेपाली राजदूतावासले काठमाडौँस्थित परराष्ट्र मन्त्रालयलाई एउटा पत्र पठायो । उक्त पत्रमा दक्षिण कोरियाको विभिन्न विश्वविद्यालयमा अध्ययनरत विद्यार्थीहरूको आर्थिक र मानसिक अवस्था तथा उनीहरूले भोग्नुपरेको पीडा र डिप्रेसनबारे उल्लेख गरिएको छ । दूतावासको उक्त पत्रमा कोरियाको कुङसुङ विश्वविद्यालय, कुङदोङ विश्वविद्यालय, जेजु हाल्ला विश्वविद्यालय र सोल ब्रिज कलेजमा अध्ययनरत नेपाली विद्यार्थीको अवस्थाबारे उल्लेख गर्दै अध्ययनका लागि दक्षिण कोरियामा विद्यार्थी पठाउँदा सोच्नुपर्ने बेला आएको बारे उल्लेख गरिएको छ ।

दूतावासको उक्त पत्रमा नेपालका कन्सल्टेन्सीहरूले झुटो आश्वासन र झुटो डिलिङ गरेर नेपाली विद्यार्थीलाई कोरिया पठाएको तर कोरियामा खाने, बस्ने तथा रोजगारीको उचित व्यवस्था नहुँदा विद्यार्थी डिप्रेसनको सिकार भएको उल्लेख गरिएको छ ।

सोलस्थित नेपाली दूतावासले परराष्ट्रमा पठाएको उक्त पत्रकै आधारमा परराष्ट्र मन्त्रालयले यसबारे थप निर्णय लिन भन्दै पत्रसहित शिक्षा मन्त्रालयमा पठाएको छ । शिक्षा मन्त्रालयमा यसबारे अहिले छलफल चलिरहेको छ ।

काम छैन, विद्यार्थी डिप्रेसनमा छन् : दूतावास

सोलस्थित नेपाली दूतावासका डेपुटी चिफ अफ मिसन (डीसीएम) किरण शाक्यका अनुसार विद्यार्थीका समस्याबारे आफूहरूले परराष्ट्र मन्त्रालयमा जानकारी गराएका छन् । नेपालबाट विभिन्न विश्वविद्यालयमा अध्ययनका लागि आएका विद्यार्थीहरूले इमेल तथा फोनमार्फत् आफूहरू नेपालको कन्सल्टेन्सीको ठगीमा परेको र बिचल्ली भएको भन्दै गुनासो र उजुरी गरेका थिए । त्यही गुनासो तथा उजुरीका आधारमा सोलस्थित दूतावासले कोरियाको विभिन्न विश्वविद्यालय तथा कलेजहरूमा गएर नेपाली विद्यार्थीलाई भेटेको थियो ।

जब दूतावास आफैले कोरियाका विभिन्न कलेजहरूमा गएर नेपाली विद्यार्थीलाई भेट्यो, स्थिति झनै भयावह देखियो । अध्ययनका लागि आएका अधिकांश विद्यार्थी डिप्रेसनमा परेको भेटियो । कतिपय विद्यार्थीले आफूलाई उद्धार गरी नेपाल पुर्याइदिन आग्रहसमेत गरे । कलेजको भाषा नबुझ्ने, भाषा नहुँदा काम नपाउने छोटो समय काम पाए पनि पूरा तलब नपाउने, काम लगाइदिने एजेन्टले कमिसन लिनेलगायतको समस्या विद्यार्थीले भोगिरहेका रहेछन् ।

त्यति मात्रै होइन, नेपालका कन्सल्टेन्सीले प्रतिविद्यार्थी कम्तीमा १ लाखदेखि २ लाखासम्म नाफा राखेर कोरिया पठाएका छन्, मासिक २ लाखसम्म कमाइ हुने भनेर । तर त्यहाँ मासिक २ लाख त के २० हजार कमाउन पनि धौ–धौ भएको भेटिएको छ ।

कन्सल्टेन्सीको यस्तै झुट र आश्वासनका कारण नेपाली विद्यार्थीहरू १४ लाखसम्म तिरेर कोरिया आएको तर भनेजस्तो कलेज नहुने, काम नपाउने र पासपोर्टसमेत कलेजले जफत गर्ने समस्याका कारण आफूहरू डिप्रेसनमा पुगेको विद्यार्थीले बताए । त्यही अनुसार दूतावासले परराष्ट्र र परराष्ट्र मन्त्रालयले शिक्षा मन्त्रालयमा अहिले सो ब्यहोराको पत्र पठाएको छ ।

Tue-Jul-2018, 12:08 pm मा प्रकाशित, 36 जनाले हेर्नुभयो

Leave a Reply

Your email address will not be published. Required fields are marked *